அது அவசியமானதா, பயனுள்ளதா?

அது உண்மையானதா, நேர்மையானதா?

அது அன்பானதா, மரியாதையானதா?

அது அறிவுப்பூர்வமானதா, உகந்த தருணமா?

"தெளிவாக அறிந்து" (Clearly Knowing) என்பதை மந்திரம் போல் மனதில் நிறுத்தி, எதை செய்தாலும் தெளிவாக அறிந்து செய்தலை விடச் சிறந்த மந்திரம் இல்லை. ஏனெனில், தெளிவான விழிப்புணர்வு மட்டுமே நம் கையில் உள்ள ஆற்றல். அந்நிலையில் மட்டுமே நாம் திறமையுடன் எதையும் கையாள முடியும், எதையும் கற்றக்கொள்ள முடியும். மற்ற நிலைகளில், நம் செயல்கள், எதிர்கொள்ளும் முறைகள், பேச்சு போன்ற அனைத்தும் இயந்திரதனமாக, தன்னியக்கமாக பழக்கத்தோசத்தில் வெளிப்படுபவை; அது வெறும் அடிமைதனமான வாழ்க்கை. நம் திறமையற்ற செயல்களுக்கும், நம் துயரங்களுக்கும் இதுவே மூலக்காரணம்.

அவசியமானதா, பயனுள்ளதா

அப்படியெனில் அது நம்முடைய அல்லது மற்றவர்களின் நல்வாழ்விற்கு, மகிழ்ச்சிக்கு உதவிகரமாக இருக்க வேண்டும். இதில் சிக்கல் என்னவென்றால், பல சமயங்களில், நமக்கு எது உண்மையான மகிழ்ச்சி தரும் என்று தெரிவதில்லை - ஒரு ஆசைக்கு பிறகு அடுத்தது என்று மனம் போன போக்கில் போய்கொண்டிருக்கிறோம். பயம் கொண்டு, சாதாரண சலிப்பு, தனிமை போன்ற அசௌகரிக உணர்வுகளில் இருந்து தப்பிக்க, பல்வேறு அடிமை பழக்கத்திற்கு ஆளாகின்றோம். அறியாமையின் காரணமாக, பேராசையையும் வெறுப்பையும் மனதில் வளர்கின்றோம் - அவை நமக்கு ஏதோ மகிழ்ச்சியைக் கொடுப்பது போல. பெரும்பாலும் செம்மறி ஆட்டு கூட்டத்தை போல், குருட்டுத்தனமாக கும்பலோடு கும்பலாக ஓடிக்கொண்டிருக்கிறோம்.

உண்மையானதா, நேர்மையானதா

உண்மையாக, நம்பகமாக இருப்பது. இதில் சிக்கல் என்னவென்றால், நம்மை நாமே ஏமாற்றிக் கொள்வதில், நடித்து மயக்கிக் கொள்வதில் நாம் மிகவும் திறமையானவர்களாக இருக்கின்றோம். நம்மால் எதை வேண்டுமானாலும் நியாயப்படுத்திக் கொள்ள முடியும். நம்மை நாமே ஏமாற்றிக் கொள்ளாமல் இருக்க மிகுந்த மனதிடம் மற்றும் தெளிவு வேண்டும்.

அன்பானதா, மரியாதையானதா

நம் மீதும், மற்றவர்கள் மீதும் அன்புடன், இரக்கத்துடன், மரியாதையுடன் இருப்பது. இதில் சிக்கல் என்னவென்றால், பொதுவாக நம்முடைய அன்பு நம் சுயநல தேவையின் வெளிப்பாடாக இருக்கிறது - அதனால் மற்றவர்களை நம் உடைமைகளாக்கி கட்டுப்படுத்துதல், வற்புறுத்துதல், கட்டாயப்படுத்துதல் போன்றவற்றை வளர்க்கின்றோம் - இது வெறுப்பு, கோபம், ஆவேசம், குறை காணுதல், குற்றம் சாட்டுதல், விமர்சித்து திட்டுதல் போன்றவைக்கு வழிவகுக்கின்றது. நம் இரக்கம் தன்னை உயர்த்திக்கொள்ளும், சுயமதிப்பை கூட்டிக்கொள்ளும் உத்தியாக அடிமனதில் இருக்கலாம்; அல்லது தன்னை பலிகொடுத்து துயரத்தை அதிகப்படுத்தும் தியாகச் செயலாக இருக்கலாம். பலர் தன்னையே கண்டனம் செய்வது, வெறுப்பது, மேலும் தனக்குத் தானே வலியை கொடுத்து கொள்வது போன்றவற்றையும் அறியாமையினால் செய்கின்றனர்.