கணினி சார்ந்த வைரஸ்கள், உடல் சார்ந்த வைரஸ்கள், மனம் சார்ந்த வைரஸ்கள் என பல வகைகள் உண்டு. மனம் சார்ந்த வைரஸ்களுக்கு மீம்கள் (Memes) என்று பெயர். இவை ஒருவரின் மூளையிலிருந்து மற்றோருவரின் மூளைக்கு கருத்துக்களாக, எண்ணங்களாக பேச்சு, உடல்-மொழி, எழுத்து என பல வகையில் பரவி, பல்வேறு வகையில் பரிணாம வளர்ச்சி அடைகின்றன. கெட்ட மீம்கள் நம்மை தொற்றிக் கொள்வதற்கான நம்மிடமுள்ள மூன்று முக்கிய பலவீனங்கள்: அறியாமை, பயம், ஆசை. இப்படியே மூடநம்பிக்கைகள், வதந்திகள் போன்றவை பரவுகின்றன. இதனால் பலவகையான சமுதாய வியாதிகள் பெருகி கிடக்கின்றன.

கெட்ட மீம்கள் தொற்றிக் கொள்ளாமல் இருக்க, முதலில் பயத்திற்கும், பேராசைக்கும் இடம் கொடுக்காமல், நம் மனதை பாதுகாத்து கொள்ள வேண்டும். அறியாமையிலிருந்து விடுபட மனது தெளிவு காண வேண்டும்; தெளிவு என்பது அமைதியில் இருந்து வருவது; அப்படிப்பட்ட தெளிவிலிருந்தே முறையான புரிதலும், அறிவும் ஏற்படும். மற்றவையெல்லாம் அறியாமையின் வெளிப்பாடாகவே இருக்கும்.

குழப்பமும் நிலையின்மையும் ஏற்படும் போது, மனதில் பாதுகாப்பின்மையும் பயமும் வந்துவிடுகின்றது. அதிலிருந்து விடுபட்டு நிம்மதி காண, பல்வேறு நம்பிக்கைகளை பற்றிக் கொண்டு அதற்கு அடிமையாகி விடுகின்றோம். ஆனால் அதை நாம் தைரியத்துடன் முழுமையான தெளிந்தறிதலுடன் அணுகி அமைதிகாக்கும் போது, அதிலிருந்து தெளிவும் புரிதலும் பிறக்கும்; அதிலிருந்தே நம்முடைய திறனான செயல்கள் வெளிப்பட முடியும்.

கெட்ட மீம்கள் பரவுவதை தடுப்பது நம்முடைய ஒவ்வொருடைய கடமை. அதை நமக்காகவும், நம் சமூகத்திற்காகவும் செய்ய வேண்டும். முதலில் கண்டபடி, சகட்டு மேனிக்கு செய்திகளை பரப்புவது நமக்கு நன்மை தருவதில்லை. இந்த தகவல்-யுகத்தில், தேவையற்ற இரைச்சலை குறைப்பது மிக முக்கியம். அதிகமான தகவல் சுமை (Information Overload) நம் தெளிவை அழிப்பதோடு, நம் உடல், மன நலனையும் கெடுக்கும்.